မနေ့က ကျမ ဟိုတယ်ဇုံကနေ အပြန်မှာ ဆရာတော်ဘုရားကြီးသီတင်းသုံးရာ
လက်လုပ်တောင်ကျောင်း ရွှေနန်းသွင်းစေတီတော်ကို ၀င်ခဲ့ပြီး ဆရာတော် ဦးခေမာကို ၀င်ကန်တော့ခဲ့ပါတယ်။
အဲဒီအခါ ဆရာတော်က ဆရာတော်ဘုရားကြီး၏ အကြောင်း သာသနာပြုမဟာခရီးသည် ဒုတိယတွဲထွက်နေပြီး
ကျပ်ငွေတစ်သောင်းဖြင့် ပူဇော်နိုင် ကြောင်းပြောကြားသိရှိရပါသည်။
ဦးခေမာထံမှ အောင်လံလွှမ်းထူ သင်္ကန်းတလူလူဆိုသည်
ဓမ္မဒါနစာအုပ်တစ်အုပ်ရရှိခဲ့ ပါသည်။ ရေးသားသူဆရာတော်မှာ ဗုဒ္ဓါရသ အရှင်က္ကုန္ဒာစရိယ (ဗောဓိရိပ်ငြိမ်တောရ-မှော်ဘီ)ဖြစ်ပါသည်။
ကျမက ဆရာတော် ဦးဗောဓိကြီးမှာ ဆရာတော်ကြီးကဲ့သို့အရေး အသားကောင်းကြောင်း ကျမက စကားပြေဖြင့်သာရေးတတ်ကြောင်းပြောမိပါသည်။
ထိုအခါ ဆရာတော်သည် များလှပြီဆိုသော ကဗျာလေးအား စာအုပ်နောက်တွင်ပါကြောင်း ဖတ်ကြည့်ပါဟုဆိုပါသည်။
ကျမသည် ထိုကဗျာလေးကို ဖတ်မိပြီး လူ့သဘာဝကို လစ်ဟပြနေသလို - ခဏခဏ လူတွေနဲ့ပတ်သက်ပြီး
ခံလိုက်ရ ပုံရတယ်ဟု တွေးမိပြီး ပြုံးမိပါသည်။ ကဲ ကဗျာလေးကို ဖတ်မိပြီးရင် မရီကျနဲ့နော်။
ရီတယ်ဆိုတာ ကိုယ်လည်း အဲဒီအထဲပါနေလို့ တည့်တည့်လေးမှန်လို့ ရီတာပေါ့။ ကျမလည်း ပါနေလေတော့
ရီမိပါတယ်လို့။
ဆရာတော်ကဗျာလေးကို ဖတ်ကြည့်ကြပါဦးရှင်။
(များလှပါပြီ)
- - ကျေးဇူးပါပဲ အပြုံးနဲ့ ပြေဖုံးကားချခဲ့ရတာ များလှပါပြီ။
- - ကူညီပါအုံး စကားလုံးနဲ့ အသုံးချခံခဲ့ရတာ များလှပါပြီ။
- - ခဏငှားပါအုံး အပြုံးစကားနဲ့ ဆုံးရှုံးခဲ့တာလည်း များလှပါပြီ။
- - မနက်ဖန်ဆိုတဲ့ ချိန်းဆိုသံနဲ့ သည်းခံခဲ့တာ များလှပါပြီ။
- - ပြန်လာခဲ့မယ်ဆိုတဲ့ မျှော်လင့်ချက်ပေးပြီး ဝေးခဲ့ရပေါင်း များလှပါပြီ။
- - သည်းခံပါ တောင်းပန်စကားကြောင့်ခွင့်လွတ်ခဲ့ရပေါင်း များလှပါပြီ။
- - ကြိုးစားတော့မည် ၀န်ခံစကားများနှင့် အလကားနေခဲ့တာ များလှပါပြီ။
- - နောင် မမှားတော့ပါ ဆိုစကားနှင့် နောက်ထပ်မှားခဲ့တာ များလှပါပြီ။
- - ခွင့်ပြုပါ ချိုစကားနဲ့ အတင်းလုသွားခဲ့တာ များလှပါပြီ။
- - သတိပျက်သုဉ်းလို့ တစ်သက်လုံး ယူကျုံးမရ ဖြစ်ခဲ့ရတာ များလှပါပြီ။
ဗုဒ္ဓါရသ အရှင်က္ကုန္ဒာစရိယ (ဗောဓိရိပ်ငြိမ်တောရ-မှော်ဘီ)
0 ဖတ်သူများပြောစကား:
Post a Comment
သိတာလေးတွေ ရှယ်ပေးပါဦး